शासन मान्यता नसलेल्या अनधिकृत संस्थांमध्ये प्रवेश न घेण्याचे आवाहन

सिंधुदुर्गनगरी, दि. 17 (जि.मा.का.) : महाराष्ट्र राज्य कौशल्य, व्यवसाय शिक्षण व प्रशिक्षण मंडळामार्फत विविध कौशल्य, व्यवसाय शिक्षण व व्यवसाय प्रशिक्षण अभ्यासक्रम मान्यताप्राप्त संस्थांमधून चालवले जातात. परंतू काहीवेळा शासन मान्यता नसलेल्या, अनधिकृत संस्थांमध्ये प्रवेशोच्छुक विद्यार्थ्यांना खोटी आमिषे दाखवून अथवा संस्था मान्यताप्राप्त असल्याचे भासवून प्रवेश घेण्यास प्रवृत्त केले जाते व नंतर विद्यार्थ्यांची फसवणूक झाल्याचे निदर्शनास येते. तरी प्रवेशोच्छुक विद्यार्थी व त्यांच्या पालकांनी खात्री करूनच संस्थांमध्ये प्रवेश घ्यावा व फसवणूक टाळावी असे आाहन योगेश पाटील, संचालक, महाराष्ट्र राज्य कौशल्य, व्यवसाय शिक्षण व प्रशिक्षण मडंळ, मुंबई यांनी केले आहे. कौशल्य, व्यवसाय शिक्षण व प्रशिक्षण अभ्यासक्रम व संस्थांना मंडळ तसेच राज्य व प्रसंगी केंद्र शासनाची मान्यता असणे आवश्यक आहे. मंडळाच्या https://msbsd.edu.im या संकेतस्थळावर सक्षम प्राधिकरणांची मान्यता असलेल्या संस्था व सदर संस्थेत चालविल्या जाणाऱ्या अधिकृत अभ्यासक्रमांची यादी उपलब्ध आहे. महाराष्ट्र राज्य कृषी, पशु व मत्स्य विज्ञान, आरोग्य विज्ञान, उच्च, तंत्र व व्यवसाय शिक्षण यामधील अनधिकृत संस्था व अनधिकृत अभ्यास पाठ्यक्रम (प्रतिबंध) अधिनियम 2013 (सन 2013 चा महाराष्ट्र अधिनियम क्रमांक 20) करण्यात आला आहे. यानुसार प्रकरण 2, कलम 3 अन्वये महाराष्ट्र राज्यात व्यवसाय शिक्षण यामधील अनधिकृत संस्था करण्यास आणि अनधिकृत अभ्यास पाठ्यक्रम सुरू करण्यात व जाहिरात करण्यात मनाई करण्यात आली आहे. राज्य शासनाची मान्यता व महाराष्ट्र राज्य कौशल्य, व्यवसाय शिक्षण व प्रशिक्षण मंडळ यांची सलग्नता नसलेल्या संस्थांमध्ये प्रवेश घेऊ नये. अनधिकृत संस्थेच्या भूलथापांना, त्यांच्या खोट्या दाव्यांना व जाहिरातींना बळी न पडता संस्था व अभ्यासक्रमांची खात्री करुनच प्रवेश घ्यावा. तसेच अनधिकृत संस्थांच्या तक्रारीबाबत मंडळ, व्यवसाय शिक्षण व प्रशिक्षण प्रादेशिक कार्यालय अथवा जिल्हा व्यवसाय शिक्षण व प्रशिक्षण अधिकारी कार्यालय यांच्याशी संपर्क साधावा. 00000