ज्ञानज्योती सावित्रीबाई फुले आधार योजनेचा विद्यार्थ्यांनी लाभ घ्यावा OBC, VJNT व SBC प्रवर्गातील विद्यार्थ्यांना अर्ज करण्याचे आवाहन

सिंधुदुर्ग, दि. 3 (जिमाका) : जिल्ह्यात उच्च शिक्षण घेणाऱ्या इतर मागास वर्ग (OBC), विमुक्त जाती व भटक्या जमाती (VJNT) आणि विशेष मागास प्रवर्ग (SBC) या प्रवर्गातील, मात्र शासकीय वसतिगृहात प्रवेश न मिळालेल्या विद्यार्थ्यांसाठी ‘ज्ञानज्योती सावित्रीबाई फुले आधार योजना’ राबविण्यास शासनाने मान्यता दिली आहे. या योजनेत भटक्या जमाती (क) प्रवर्गातील धनगर समाजातील विद्यार्थ्यांचा समावेश करण्यात आलेला नाही. सन 2026-27 या शैक्षणिक वर्षासाठी या योजनेअंतर्गत विमुक्त जाती, भटक्या जमाती व विशेष मागास प्रवर्गातील बारावी नंतरच्या पदवी व पदव्युत्तर तसेच व्यावसायिक व बिगर व्यावसायिक अभ्यासक्रमांच्या प्रथम वर्षात प्रवेश घेतलेल्या विद्यार्थ्यांसाठी ऑनलाइन अर्ज करण्याचे पोर्टल सुरू करण्यात आले आहे. विद्यार्थ्यांना ऑनलाइन अर्ज करण्यासाठी दि. 1 सप्टेंबर 2026 ते 15 सप्टेंबर 2026 या कालावधीत मुदतवाढ देण्यात आली आहे. पात्र विद्यार्थ्यांनी https://hmasnew.mahait.org/ या संकेतस्थळावर जाऊन ऑनलाइन अर्ज भरावा. ऑनलाइन अर्ज भरल्यानंतर आवश्यक कागदपत्रांसह अर्जाची एक प्रत सहायक संचालक, इतर मागास बहुजन कल्याण, सिंधुदुर्ग, डॉ. बाबासाहेब आंबेडकर सामाजिक न्याय भवन, सिंधुदुर्गनगरी, ता. कुडाळ, जि. सिंधुदुर्ग या कार्यालयात जमा करावी. सन 2026-27 या शैक्षणिक वर्षासाठी पात्र विद्यार्थ्यांनी ‘ज्ञानज्योती सावित्रीबाई फुले आधार योजनेचा’ लाभ घेण्यासाठी विहित मुदतीत ऑनलाइन अर्ज करावा, असे आवाहन इतर मागास बहुजन कल्याणचे सहायक संचालक उदयसिंह गायकवाड यांनी केले आहे. 0000000000