हलक्या पावसानंतर दाट धुके; नागरिकांना सतर्कतेचे आवाहन

सिंधुदुर्गनगरी, दि. 24 (जिमाका):- जिल्ह्यात दि.२३ फेब्रुवारी २०२६ रोजी काही ठिकाणी हलक्या स्वरूपाचा पाऊस झालेला आहे. त्यानंतर दि.२४ फेब्रुवारी २०२६ रोजी सकाळी जिल्ह्यात बऱ्याच ठिकाणी दाट धुके पसरलेले आढळून आले आहे. या पार्श्वभूमीवर धुक्याच्या पार्श्वभूमीवर नागरिकांसाठी पुढील प्रमाणे खबरदारीच्या सूचना जिल्हा आपत्ती व्यवस्थापन प्राधिकरण मार्फत प्रसारित करण्यात येत आहेत. धुके म्हणजे काय? पाणी आणि बर्फाचे अत्यंत सुक्ष्मकण हवेमध्ये तरंगत असल्यामुळे दृष्यमानता कमी होते. किमान १ किलोमिटर वरील दृष्य न पाहता येण्यासारखो स्थिती म्हणजे धुके होय. तर साधारणतः २०० ते ५०० मिटर अंतरावरील दृष्य न दिसण्यास मध्यम (Moderate) प्रकारचे धुके संबोधले जाते, ५० ते २०० मिटर अंतरावरील दृष्य न दिसण्यास दाट (Dense) प्रकारचे धुके संबोधले जाते तर ५० मिटर पेक्षा कमी अंतरावरील दृष्य न दिसण्यास घनदाट (Very Dense) प्रकारचे धुके संबोधले जाते. धुक्याच्या परिस्थितीत सार्वजनिक सुरक्षेसाठी व रस्ता अपघात टाळण्यासाठी नागरिकांनी पुढील प्रमाणे दक्षता घेण्याचे आवाहन करण्यात येत आहे. प्रवासादरम्यान मुख्य रस्त्यावर वाहन उभे करू नये. वाहन थांबविल्यास फॉग लाईट/पार्किंग लाईट सुरू ठेवून इतरांना स्पष्ट दिसेल याची खात्री करावी. वाहन चालविणे कठीण झाल्यास रस्त्याच्या कडेला सुरक्षितपणे थांबून इंडिकेटर (हॅझर्ड लाईट) सुरू ठेवावा. डिफॉस्टर आणि विडस्क्रीन वायपरचा वापर करा. फॉग लाईट किंवा लो-बीम हेडलाईटचा वापर अनिवार्यपणे करावा. पुढील वाहनापासून सुरक्षित अंतर ठेवावे व नियंत्रित वेगात वाहन चालवावे. अचानक ब्रेक लागण्याच्या परिस्थितीसाठी सतर्क राहावे. अनावश्यक ओव्हरटेकिंग टाळावे व लेन शिस्त काटेकोरपणे पाळावी. सर्व वाहतूक नियमांचे पूर्ण पालन करावे. वाहन चालविताना मोबाईल फोनचा वापर किंवा इतर विचलित करणाऱ्या कृती टाळाव्यात. दुचाकीस्वारांनी हेल्मेट वापरावे आणि चारचाकी चालकांनी सीट बेल्ट लावावा. रस्त्यावरील चिन्हे व सूचना फलकांचे पालन करून सावधगिरीने वाहन चालवावे. पहाटे व उशिरा रात्री प्रवास करताना विशेष खबरदारी घ्यावी. सार्वजनिक वाहतूक वाहन, ट्रॅक्टर-ट्रॉली, शाळा वाहने व जड वाहनांवर रिफ्लेक्टिव्ह टेप लावण सुनिश्चित करावे. डावीकडे किंवा उजवीकडे वळताना इंडिकेटरचा वापर करावा. जड वाहन चालकांनी वाहनाच्या बाहेर माल लोंबकळेल अशा पद्धतीने वाहतूक करू नये. ओल्या रस्त्यावर सावकाश वाहन चालवा. कृषी विद्यापीठाकडून प्रसारित केल्या जाणाऱ्या कृषी सल्ल्याला अनुसरून शेतकऱ्यांनी पिकांची व फळबागांची काळजी घ्यावी. हवामानाची माहिती भारतीय हवामान खात्याच्या https://mausam.umd.gov.in या संकेतस्थळावरून घ्या. अफवांवर विश्वास ठेवू नका व अफवा पसरवू नका. कुठल्याही मिळालेल्या बातमीची खात्री अधिकृत सुत्रांकडून करून घ्या किंवा जिल्हा नियंत्रण कक्ष (०२३६२/२२८८४७ किंवा टोल फ्री १०७७ किंवा पोलीस हेल्पलाईन क्रमांक ११२ वर संपर्क साधावा, असे आवाहन जिल्हा प्रशासनामार्फत करण्यात आला आहे. ०००००