विभागीय चाचा नेहरु बाल महोत्सवात निरीक्षणगृह व बालगृह संस्थेतील बालकांचे दैदीप्यमान यश - अधीक्षक बी.जी. काटकर

सिंधुदुर्गनगरी, दि. 28 (जि.मा.का.) : मुंबई येथे पार पडलेल्या विभागीय चाचा नेहरु बाल महोत्सवात जिल्ह्यातील चैतन्य परब गोळाफेक प्रथम क्रमांक, आदित्य राठोड (न्यु इंग्लिश स्कुल ओरोस) 100 मीटर धावणे प्रथम क्रमांक, निहीत मालवणकर व आदित्य राठोड कॅरम स्पर्धा व्दितीय क्रमांक, तसेच स्वराज पाटील (डॉन बॉस्को स्कुल ओरोस) याने वक्तृत्व स्पर्धमध्ये तृतीय क्रमांक पटकावला ही सर्व मुले शासकिय मुलांचे निरीक्षणगृह व बालगृह ओरोस या संस्थेतील आहेत.या सर्व बालकांनी बालमहोत्सवात दैदीप्यमान यश संपादन केले आहे, अशी माहिती शासकीय मुलांचे निरीक्षणगृह व बालगृहाचे अधीक्षक बी.जी. काटकर यांनी दिली. विभागीय चाचा नेहरु बाल महोत्सव सन 2022-23 चे दि.23 फेब्रुवारी ते दि.25 फेब्रुवारी या कालावधीत दि चिल्ड्रेन एड सोसायटी संचलित चेंबुर चिल्ड्रेन्स होम, मानखुर्द मुंबई येथे विभागीय उपआयुक्त, महिला व बाल विकास विभाग, कोकण विभाग, मुलुंड-मुंबई यांनी आयोजन केले होते. या बालमहोत्सव मध्ये कोकण विभागातील मुंबई शहर, मुंबई उपनगर, ठाणे, पालघर, रायगड, रत्नागिरी, सिंधुदुर्ग या जिल्ह्यातील बालगृह व निरीक्षणगृह संस्थानी सहभाग घेतला होता. यामध्ये विविध वैयक्तिक व सांघिक क्रिडा स्पर्धा व सांस्कृतिक कार्यक्रम घेण्यात आले होते यामध्ये शासकिय मुलांचे निरीक्षणगृह व बालगृह ओरोस या संस्थेतील बालकांनी सहभाग घेवून दैदीप्यमान यश संपादन केले. जिल्हाधिकारी के. मंजुलक्ष्मी तसेच यांनी यश संपादन केलेल्या सर्व बालकांचे अभिनंदन करुन बालकांच्या पुढील वाटचालीस शुभेच्छा दिल्या. जिल्हा महिला व बाल विकास अधिकारी सोमनाथ रसाळ यांनी व बाल कल्याण समितीच्या सदस्यांनी यशस्वी बालकांचे अभिनंदन केले आहे. महिला व बाल विकास विभाग, यांच्यामार्फत राज्यातील अनाथ, निराधार, काळजी व संरक्षणाची गरज असलेल्या तसेच उन्मार्गी लागलेल्या बालकांमधील सुप्त गुणांना वाव मिळण्याकरीता सन 2012 पासुन चाचा नेहरु बाल महोत्सव साजरा करण्यात येतो. 00000