जागतिक बालकामगार विरोधी दिन

सिंधुदुर्गनगरी, दि.11 (जि.मा.का): बालकामगार या सामाजिक अनिष्ट प्रथेचे समूळ उच्चाटन करण्याच्या दृष्टीने समाजामध्ये जागृती होण्यासाठी शासनाच्या विविध विभागामार्फत व विविध स्तरावर प्रयत्न केले जात आहेत. 12 जून जागतिक बालकामगार विरोधी दिनाचे औचित्य साधून सरकारी कामगार अधिकारी, कार्यालयामार्फत जनजागृती कार्यक्रम हाती घेण्यात आले असल्याची माहिती सरकारी कामगार अधिकारी यांनी दिली आहे. 14 वर्षाखाली बालकास सर्वच व्यवसाय व प्रक्रियांमध्ये काम करण्यास प्रतिबंध करण्यास आलेला आहे. 14 ते 18 वयोगटातील किशोरवयीन बालकास धोकादायक व्यवसाय व प्रक्रियांमध्ये कामगार ठेवणे हा फौजदारी गुन्हा आहे. फौजदार गुन्ह्यासाठी 6 महीने ते 2 वर्षापर्यंत वाढविता येईल इतक्या तुरुंगवासाची शिक्षा किंवा किमान रु. 20 हजार ते कमाल रु. 50 हजार इतका दंड किंवा दोन्हीही शिक्षा मालकास होऊ शकतात. गुन्ह्याची पुनरावृत्ती झाल्यास, किमान 1 वर्ष ते 3 वर्षापर्यंत वाढविण्यात येईल इतकी तुरुंगवासाची शिक्षा होऊ शकते. सर्व औद्योगिक संघटना, असोशिएशन, व्यापारी असोशिएशन, क्रिडाई- बांधकाम व्यवसायातील मालक असोशिएशन व वीटभट्टी असोशिएशन, सर्व शासकीय, निमशासकीय संस्था नागरीक यांनीही या अनिष्ट प्रथेचे उच्चाटन करण्याकरीता जनजागृती करुन या मोहिमेत सहभाग नोंदवावा व आपला जिल्हा बालकामगार मुक्त करण्यासाठी सहकार्य करावे असे आवाहन सरकारी कामगार अधिकारी कार्यालयामार्फत करण्यात आले आहे. ०००००