सावंतवाडी येथे उद्योग मित्र समितीची सभा संपन्न

सिंधुदुर्गनगरी, दि. 09 (जि.मा.का):- जिल्ह्यात उद्योग मित्र समितीची सभा जिल्हाधिकारी तृप्ती धोडमिसे यांच्या अध्यक्षतेखाली तहसिल कार्यालय सावंतवाडी येथे संपन्न झाली, असल्याची माहिती जिल्हा उद्योग केंद्राचे महाव्यवस्थापक श्रीपाद दामले यांनी दिली आहे. या सभेत जिल्हाधिकारी श्रीमती धोडमिसे म्हणाल्या, सावंतवाडी उद्यमनगर सहकारी औद्योगिक वसाहत यांच्याकडील प्रलंबित समस्यांतात्काळ सोडवावेत. जमिनीची मोजणी ऑनलाईन पद्धतीने होत नसेल तर ऑफलाईन पद्धतीने करावी. जमिन शासकीय असल्यामुळे विनाशुल्क मोजणी करून द्यावी, अशा सूचना जिल्हाधिकारी यांनी दिल्या. जिल्हाधिकारी यांनी सबंधित महसूल अधिकारी यांना सावंतवाडी उद्यमनगरला लागून असलेला सर्व्हे नं. ९५/४ च्या नोंदी अद्ययावत करून घेण्यासाठी योग्य ती कार्यवाही करण्याचे निर्देश दिले. तसेच हस्तांतरण होत असताना जुन्या नोंदी वगळण्याबाबत योग्य ती कार्यवाही करण्याचे निर्देश महसूल अधिकारी यांना देण्यात आले. यावेळी सावंतवाडी तहसीलदार श्रीधर पाटील यांच्यासह जिल्ह्यातील उद्योजक उपस्थित होते.