सामाजिक न्याय विभागाच्या अनुसूचित जाती योजनांची कलापथक व चित्ररथाव्दारे प्रचार- प्रसिध्दी - जिल्हा माहिती अधिकारी प्रशांत सातपुते

सिंधुदुर्गनगरी, दि. 16 (जि.मा.का.) : अनुसूचीत जातीच्या लोकांचा सर्वांगीण विकास व्हावा, यासाठी शासन सामाजिक न्याय व विशेष सहाय्य विभागाच्या माध्यमातून अनेक कल्याणकारी निर्णय घेत असते. या निर्णयांचा लाभ लाभार्थीपर्यंत पोहचावा त्याची प्रचार- प्रसिध्दी व्हावी, यासाठी माहिती जनसंपर्क महासंचालनालयाच्या अंतर्गत जिल्हा माहिती कार्यालय प्रचार- प्रसिध्दी करते.सध्या जिल्ह्यामध्ये सामाजिक न्याय व विशेष सहाय्य विभागाच्या अनुसूचित जातीसाठी असणाऱ्या योजनांची कलापथक व चित्ररथाच्या माध्यमातून प्रचार- प्रसिध्दी सुरु असल्याची माहिती जिल्हा माहिती अधिकारी प्रशांत सातपुते यांनी दिली. जिल्हा माहिती कार्यालयाच्यावतीने कलापथक व चित्ररथ जिल्ह्यातील सर्व तालुक्यातील प्रमुख गावांमध्ये फिरणार आहे. कला पथकामध्ये शाहीर कल्पना माळी,तळवणे- सावंतवाडी, विश्राम ठाकर आदिवासी कला आंगण चॅरिटेबल ट्रस्ट, पिंगुळी गुढीपूर व चैतन्य महिला विकास मंडळ बांदा- सावंतवाडी यांचा समावेश आहे. तर स्काय क्रिएशन, कोल्हापूर येथील चित्ररथ आहे. कला पथक व चित्ररथामध्ये अनुसूचित जातीसाठी असणाऱ्या अनेक योजनांची सविस्तर माहिती व्हीडिओ जिंगल्सच्या माध्यमातून दिली जात आहे.अनुसूचित जातीच्या योजनांचा लाभ घेण्यासाठी कला पथकाव्दारे सांगितलेली व चित्ररथावरुन प्रसारित होणारी माहिती पाहून व जाणून घेवून त्या योजनांना लाभ घ्यावा, असे आवाहन श्री. सातपुते यांनी केले आहे.