राज्यांतर्गत अन्नधान्य, कडधान्य व गळीतधान्य पिकांच्या पिकस्पर्धा खरीप हंगाम २०२६ साठी शेतकऱ्यांनी ऑनलाईन प्रणाली द्वारे अर्ज करण्याचे आवाहन

पोलिओ निर्मुलन, जागतिक शांतता आणि कोविड रूग्णांचा आत्मविश्वास वाढविण्याचे कार्य कौतुकास्पद ---जिल्हाधिकारी के. मंजुलक्ष्मी सिंधुदुर्गनगरी (जि.मा.का) दि. 24 : रोटरी इंटरनॅशनलचे पोलिओ निर्मुलन व जागतिक शांततेसाठीचे कार्य खुपच मोठे आहे. कोरोना महामारीच्या काळात रोटरी क्लब ऑफ कुडाळचे कोविड रूग्णांचा आत्मविश्वास वाढवणारे कार्य कौतुकास्पद असून जिल्हा प्रशासनाच्यावतीने सर्व रोटेरियन्स व डॉक्टर्स यांचे अभिनंदन जिल्हाधिकारी के. मजुलक्ष्मी यांनी केले. रोटरी क्लब ऑफ कुडाळने कोविड योध्दयाप्रमाणे रोटरी उमेद होम आयसोलेशन काऊंन्सलिंग कार्यक्रम, युध्द कोरोनाशी एक जनजागृती, ऑक्सिजन कॉन्सनट्रेटर मशीन्स, मेडिकल साहित्य वाटप, असे विविध उपक्रम राबवित सिंधुदुर्ग जिल्हा प्रशासाला मोलाचे सहकार्य केले आहे, असे गौरवोद्गार सिंधुदुर्ग जिल्हाधिकारी के मंजुलक्ष्मी यांनी 24 ऑक्टोबर जागतिक पोलिओ दिनानिमित्त रोटरी क्लब ऑफ कुडाळच्या वतीने कुडाळ सायकल क्लब, रेन्बोरायडर्स सुकळवाड, ब्युटीज ऑन व्हिल्स कट्टा यांच्या संयुक्त भव्य रोटरी पोलिओ जनजागृती सायकल रॅलीचे जिल्हा पोलिस अधीक्षक कार्यालय सर्कल सिंधुदुर्गनगरी येथे स्वागत करताना व्यक्त केले. यावेळी रोटरी क्लब ऑफ कुडाळचे अध्यक्ष सचिन मदने, उपजिल्हा शल्य चिकित्सक डॉ. श्रीपाद पाटील, रोटरी डिस्ट्रिक्ट 3170 असिस्टंट गव्हर्नर प्रणय तेली, रोटरी क्लब ऑफ कुडाळचे माजी अध्यक्ष गजानन कांदळगावकर, राजन बोभाटे, प्रमोद भोगटे, सचिव अभिषेक माने, खजिनदार अमित वळंजू, राजेंद्र केसरकर, एकनाथ पिंगुळकर, राजू पवार, अभिजित परब, राकेश म्हाडदळकर, रेन्बोरायडर्सचे डॉ बापू परब, डॉ सोमनाथ परब, डॉ सिध्दांत परब, दै तरूण भारतचे जिल्हा आवृत्तीप्रमुख शेखर सामंत,आदी मान्यवर उपस्थित होते. संपूर्ण जगात रोटरीने 1988पासून पोलिओ निर्मुलन चा इतिहासातील सर्वात मोठा उपक्रम यशस्वी करताना 99.9% जग पोलिओमुक्त केले आहे. दरवर्षी जगभरात 40कोटी बालकांना 1.50लाख रोटरी आरोग्य मित्राद्वारे घरोघरी पोलिओ लस दिली जाते. आतापर्यंत रोटरीने पोलिओ निर्मुलन साठी 1 लाख 98 हजार 111 कोटी 15 लाख रूपये खर्च केला आहे. रोटरीचे हे महान कार्य जनसामान्यांपर्यंत पोहचावे यासाठी 24 ऑक्टोबर जागतिक पोलिओ दिनानिमित्त जगभरात रोटरीमार्फत विविध जनजागृती अभियान राबविले जात आहे. रोटरी क्लब ऑफ कुडाळ ने रोटरी पोलिओ जनजागृती अभियानांतर्गत कुडाळ सायकल क्लब, रेन्बो रायडर्स सुकळवाड, ब्युटी ऑन व्हिल्स कट्टा यांच्या सहकार्याने भव्य सायकल रॅलीचे आयोजन केले होते. ही सायकल रॅली पहाटे 5.30 वाजता मराठा समाज सभागृह कुडाळ येथून सुरू झाली. कुडाळ पोस्ट ऑफिस, एस टी डेपो, जिजामाता चौक ओरोस, जिल्हा पोलिस अधीक्षक कार्यालय सर्कल, ओरोस फाटा, कुडाळ बाजारपेठ मार्गे मराठा समाज सभागृह कुडाळ या मार्गाने अतिशय सुंदर व निटनेटक्या नियोजनात संपन्न झाली. या सायकल रॅलीमध्ये एकूण 50 सायकलपटू सहभागी झाले होते. सदर सायकल रॅलीचे जिल्हा पोलिस अधीक्षक कार्यालय सर्कल सिंधुदुर्गनगरी येथे जिल्हाधिकारी के. मंजुलक्ष्मी यांनी स्वागत करत स्वतः सायकलसह सहभागी झाल्या. यावेळी रोटरी क्लब ऑफ कुडाळच्या वतीने जिल्हाधिकारी के. मंजूलक्ष्मी यांचे कोविड योध्दा गौरवपत्र, चंदनाचे वृक्ष देऊन अध्यक्ष सचिन मदने यांच्याहस्ते गौरव करण्यात आला. ज्येष्ठ पत्रकार शेखर सामंत, डॉ बापू परब, डॉ सोमनाथ परब, डॉ. श्रीपाद पाटील आदींचा सत्कार करण्यात आला. कुडाळ पोस्ट ऑफिस येथे सदर रॅलीमध्ये कुडाळ पोलिस स्टेशनचे पोलिस निरीक्षक शंकरराव कोरे सहभागी झाले. मराठा समाज सभागृह कुडाळ येथे रॅलीचा समारोप करण्यात आला यावेळी पोलिस निरीक्षक शंकरराव कोरे यांचा रोटरी क्लब ऑफ कुडाळ च्या वतीने अध्यक्ष सचिन मदने यांच्या हस्ते सत्कार करण्यात आला. पोलिस निरीक्षक शंकरराव कोरे यांच्याहस्ते रोटरी पोलिओ जनजागृती कॅपचे वाटप करण्यात आले. कुडाळ पोलिसांचे व सिंधुदुर्ग पोलिसांचे मोलाचे सहकार्य या आयोजनामध्ये मिळाल्याबद्दल रोटरी क्लब ऑफ कुडाळ च्या वतीने सिंधुदुर्ग पोलिसांचे विशेष अभिनंदन करण्यात आले. तर गजानन कांदळगावकर यांनी सर्वांचे आभार मानले. सोबत फोटो. 00000